Kitni ajeeb pareekshhayen lete ho,
Kyon achchhe praniyon ko itna kasht dete ho;
Tadpaate ho itna kyon masoomon ko,
"Nirdayi hun", kyon nahin spasht keh dete ho?

Banaya mujhe itna kamzor,
Ki kisi ka dukh dekh na paun;
Diya dil aisa ki, ki dravit dekh ke ro hi jaun.
Fir kyon nahin di itni taakat,
Ki dukh unke door kar paun?
Kyon nahi diya saamarthy itna, ki duniya se bhi lad jaun?

Kyon dekhna padta hai, apnon ko rote huye?
Jisne sada sabse prem kiya, unhe aansuon me sote huye.
Nahin saha jata Prabhu, sabse kathhin drishy hota hai,
Kisi priyjan ka, apne se door hote huye.

Janta hoon, ki sab nashwar hai,
Ik din sab chhod ke jana hai.
Ye duniya to bas kuchh varshon ka, ek asthayi thhikana hai.
Fir bhi dil ye kyon rota hai,
Jankar bhi ki sab teri ichchha ka hi bahana hai.

Hoon jagruk, sab dimaag hai,
Fir bhi na jane kyun itna trast hoon?
Shayad ye atydhik moh hi hai, jisse buri tarah grast hoon.
Par duniya ke har manushy ka, sach to yahi hai ki-" Aaj dukhi hoon, kal mast hoon".

Par tum ho lo khush,
Hans lo meri kamzori pe,
Dimaag diya, par sath me dil bhi de diya, is dukhad anhoni pe;
Par yaad rakho, naam tumhara hi kharab hoga,
Kyonki jo main isse lad na paya, to tyaag dunga praan, tere hi naam ki hori pe.

Kya jeevan bhar aisa hi reh
jaunga?
Kya kabhi tum mazboot na banaoge?
Kya kabhi tumhare darshan kar paunga?
Ya jeevan bhar is moh ki dariya me dubaoge?

Soch lo, tumhe Kripasagar kehte hain,
Tumhare hi andar, tumhare saare bachche rehte hain.
Jo is sagar ki boond na pilayoge,
To tum Kripasagar nahin, marusthal hi kehlaoge.

Kehte hain tum bas prem ki bhasha jaante ho,
Na dhan, na tareef, bas bhavnayon ki baat maante ho;
Par us bhasha ka kya kaam, jo meethhe vachan na bol sake,
Ab bhi sukun na doge, to kewal goonge kehlaoge, jaante ho!?

Krodh itna hai ki tumhe bhool jaun,
Saare sambandh tod dun,
Bas duniya me hi man lagaun,
Par lat aisi lagi hai, nasha aise ho tum,
Jo man tumhe bhool jaye, aisa man kahan se laun?

Par ab tumhaare raaste pe aur na chala jayega,
Kamzor hoon, samajh aa gya hai.
Sirf laachari aur bebasi di hai tumne,
Ye shareer ab koshish kar kar ke thak sa gya hai; ab aur sambhal na payega.

Suna tha adhik raasta to tum hi tay karte ho,
Humein to bas kadam badhane ki der hai.
Par ab pata chal raha hai,
Ki yahan der nahin, sirf aur sirf andher hai.

Dekhe the sapne, tumhe paane ke,
Gale lagne ke, tumhaare mujhe apnaane ke;
Par ab sirf dil tootega, milega sirf dukh.
Kyonki tu milega to hai nahin, matlab kabhi nahi milega sukh!

Tu nishthhur hai, "Har" nahi, harjai hai,
Tu sirf kasht deta hai, kaam tera bewafai hai;
Kasht se ladne ki shakti bhi to de,
Ya yun hi mili tujhe jag me itni sari badai hai?

Ab agar koi sharam ho,
To mera peechhe se hath thaam lena.
Ek dayalu Mata ki tarah, prem se ek baar mera naam lena.
Kyonki main sada ashanvit rahunga,
Ki tum aaoge, aur mujhe apnaoge.
Aur apni chir parichit muskan dikhakar,
Is thake man ko aaram dena.

Ab nahi saha jata Prabhu,
Logon ke dukh nahi dekhe jate,
Kar do apna naam siddh,
Dukhiyon ko asha ke teer ab aur nahin fenke jate.
Ab to barsa do us sagar ki ek boond,
Varna use anupyogi rakh ke bhi tum kya sukh paoge?